KORONADAL CITY – Nagapadayon ang imbestigasyon sang mga otoridad sa nagluntad nga drag racing sang mga riders sa national highway sa banwa sang Isulan, Sultan Kudarat nga nagresulta sa pagkadisgrasya kun diin may nadalahig pa nga isa ka motorista.
Ini ang nangin pahayag ni Police LTCOL. Julius Malcontento, hepe sang Isulan PNP sa interview sang Bombo Radyo Koronadal.
Suno kay Malcontento, naguwa sa ila inisyal nga imbestigasyon nga ang grupo sang mga riders nga ginatawag waswas ang nagpatigayon sang dragrace sa Bambad nga nagresulta sa pagkadisgrasya sang isa nila ka upod kag pagkadalahig sang isa pa ka motorsiklo.
Dugang pa ni Malcontento, una nga nareport sa ila ang natabo nga disgrasya gani nagresponde ang kapulisan kag rescuers apang pag-abot nila sa lokasyon sang insidente, isa ka motorista nga pilason ang naabtan kag ang ginamaneho sini nga Bajaj motorcycle.
Pagkaligad sang pila ka oras, naguwa ang video sang aksidente kun diin nakita ang pagkadisgrasya sang upos sang madamo nga riders nga nagakarera kag natukiban nga nadalahig lang ang isa nga na-rescue sang mga otoridad.
Nahibaluan nga wala marekober sa incident area ang isa pa ka motorsiklo nga naaksidente nga upod sang grupo lakip na ang nagamaneho sini bangud may nagasunod suno pa nga salakyan nga gilayon naghimos sini kag gindala sa hospital ang injured nga driver.
Ginpadulungan sang kapulisan ang pilason nga rider nga gindala sa Cotabato Regional Center kag yara ini sa kritikal nga kondisyon kadungan sang pagpanginwala sang pamilya sini nga indi suno pa ini kalakip sa grupo nga Waswas.
Samtang, makaligad ang pagviral sang video sang aksidente bangud sa karera sang mga riders, nagpost sang pangalan si Isulan Mayor Bai Rihan Mangudadatu-Sakaluran nga ginaaligar involved sa hitabo.
Sa follow up operation sang mga otoridad, narekober ang motorsiklo sang mga involbado nga riders apang wala ang mga driver sini.
Sa subong naapadayon suno pa ang nga mas maid-id nga imbestigasyon agud mahibaluan ang identity sang mga ini kag sang ila nga organizer.
Kadungan sini, nagapanawagan si Malcontento sa tanan nga makig-angot sa ila sa tion nga may ihibalo angot sa nasambit nga grupo.
Samtang, ginapangabay man sini ang mga ginikanan sang mga kabataan nga mahilig sa pagkarera sa dalanon nga sawayon ang mga ini kag indi na pagpahanugutan nga magmaneho.
