Nagpagwa ang Israel sang wala sing kasubong nga serye sang mga atake batok sa Iran, isa ka adlaw matapos ang pagbomba sang Estados Unidos sa pila ka nuclear facility sang nasambit nga pungsod.
Sa kapital sang Iran nga Tehran, klaro nga nakita ang madulom nga aso kag debris nga naga-alsa sa kalangitan matapos ang sunod-sunod nga mga paglupok.
Ginkumpirmar sang gobyerno sang Israel nga ila nga gintarget ang anum ka airspace sa nagkalain-lain nga bahin sang Iran, isa ka prisohan, Islamic Revolutionary Guard Corps (IRGC), kag pila ka mga building nga ginapanag-iyahan sang kapulisan.
Ginakabig man nga may isa ka unibersidad nga naulamid sa tunga sang mga pag atake, apang padayon pa ang damage assessment nga gintuga sang pag atake.
Sa subong, wala pa opisyal nga ihibalo sa kadamuon sang mga napatay ukon pilason, apang ginapaabot nga magpagwa sang pahayag ang gobyerno sang Iran sa masunod nga mga oras.
Nagpabutyag sang kasubo kag kahangawa ang madamo nga pungsod bangud sa posible nga paglala sang tensyon sa rehiyon sang Middle East.
