Ginsabat sang Israel sang Martes nga nagbomba sang kapin sa 350 ka mga pasilidad militar sa Syria sa nagligad nga 48 ka oras, nga gintarget ang kalabanan sang mga strategic nga armas nga ginatigana sa pungsod.
Suno kay Israeli Prime Minister Benjamin Netanyahu ang sunod sunod nga mga airstrike sa kaiping nga Syria kinahanglanon agud mapunggan ang mga armas nga magamit batok sa Israel.
Gin-ako man sang Israel nga ang ila mga tropa nagasulod sa isa ka border buffer zone sa sulod sang Syria, nga ginlunsyar pagkatapos sang 1973 Mideast war.
Apang, ginapnginwala sang Israel nga ang ila mga pwersa nagasulong sang Martes pakadto sa kapital sang Syria nga Damascus.
Suno naman sa Estados Unidos sang Martes nga ila irecognisa kag suportahan ang bag-o nga gobyerno sang Syria nga nagasikway sa terorismo, nagaguba sang mga armas kemikal, kag nagaprotekta sa mga kinamatarung sang mga minorya kag mga babayi.
Halos 14 ka tuig na ang civil war sa Syria nga nagpatay sa halos tunga sa milyon nga mga tawo kag nagpalayas sa tunga sang populasyon sang pungsod nga 23 milyon, nga nangin isa ka proxy battlefield para sa mga rehiyonal kag internasyonal nga mga gahom.
