KORONADAL CITY – Tigayon nga ginbawian sang kabuhi ang isa sa apat ka mga suspek nga miyembro sang Daulah Islamiah-Maguid group makaligad ang nagluntad nga engkwetro sa bahin sang Brgy. Pagalungan sa banwa sang Polomolok.
Suno kay P/Capt. Randy Apostol, Deputy Chief Of Police sang Polomolok PNP, ginkilala ang napatay nga si Nasrodin Gansal Lodsiman residente sang Brgy. Sumakil, Polomolok samtang ginkilala naman ang iban pa nga sanday Russel Mamo, Abu Saif, kag Jayrol Darino nga nagpalagyo mismo sa una nga engkwentro sa mga pulis.
Ang nasambit nga mga indibidwal ang may kahimoan sa pagpangarnap, motornap kag pagpangawat indi lamang sa banwa sang Polomolok apang mangin sa kaiping nga mga lugar.
Nahibaloan nga samtang nagapatigayon sang hot pursuit operation ang mga pulis batok sa mga ini, nakit-an nga may nahulog nga motorsiklo sa isa ka taytay kun sa diin nadakpan ang isa sa mga ini.
Narekober naman sa ginluntaran sang shootout ang mga kalibre sang bala, revolver, submachine gun kag M-16 rifle nga ginapanag-iyahan ni Pat. Bryan Costelo.
Kun madumdoman nga napatay sa nagluntad ambush sadtong bulan sang Abril sa Brgy. Koronadal Proper si Pat. Bryan Costelo kag upod sini nga si Cpl. Winzel Russ Betantos.
