KORONADAL CITY – Nagaapela sang bulig ang mga residente sa Prk. Kawayan, Brgy. Poblacion, Bagumbayan, Sultan Kudarat agud gilayon nga maaksyonan ang ila kahimtangan kag mahatagan sang bulig.
Lubog sa tubig baha ang nasambit nga lugar kun sa diin tubtob sa tuhod ang kadalumon sini.
Sa interbyu sang Bombo Radyo Koronadal kay alyas Aida, ginpahayag sini nga wala pa nagatahaw ang tubig-baha sa ila humalin pa sadtong Hulyo 30.
Magluwas diri, paubos man sila sa suplay sang pagkaon kun sa diin isa ka bes na lamang sa isa ka adlaw sila nga nagakaon.
Nagpaguwa man ini sang hibubun-ot sa suno pa kawad-an sang aksyon sang Bagumbayan LGU sa ila kahimtangan.
Sa ulihi, nagapanawagan ini nga buligan sila labi na nga madamo nga mga kabataan ang nagaangkon na sang mga balatian tuga sang tubig-baha.
