KORONADAL CITY- Halos wala na kabawi ang isa ka mangunguma nga naapektuhan makaligad nga gindalasa sang pagbaha ang iya nga mga palay, bangud naman sa tuman nga pagbaha kag landslide nga naeksperyensya sa Sitio Supon, Barangay San Jose, Koronadal City.
Sa interbyu sang Bombo Radyo Koronadal kay Joel Osita, nagapanag-iya sang palay, gipahayag sini nga halarbeso na kun tani ang palay apang wala gid sila nag ekspektar nga naguba pa ini sang lapnagon nga baha tuga sang mabaskog nga pagbubo sang ulan sang naglabay nga adlaw.
Suno sa iya, sa palaabuton nga Mayo 25 na kuntani ma-harvest ang ila palay apang bangud sa kalamidad halos wala na sila sang mapuslan diri.
Gilayon naman nga nagpromisa ang Barangay Officials nga sila ang mahatagan sang nagakaigo nga ligwa, pinaagi man sa pakig angot sa City Disaster Risk Reduction and Management Council.
Gindugang pa sini, nga ang ila nga lugar ang permi maka eksperyensya sang pag-ulan, sa tion nga naga ulan apang subong lang gid ang tuman nga damage nga ginbilin sang kalamida.
Nahibaluan nga isa ang Barangay San Jose nga apektado sang pagbaha kag landslide bangud sa tuman nga pag-ulan nga naeksperyensyahan nga kung sa diin halos 60 ka mga indibidwal ang nagapabilin sa karon sa Regional Evacuation Center sa Brgy. San Jose, Koronadal City.
