KORONADAL CITY- Gindakop sang mga katapo sang Koronadal City Police Station ang isa ka lalaki nga nakuhaan sang armas-luthang sa diin nagtuga sang kakulba sa pipila makaligad nga naakig sang ginbugtaw ini sa iya nga katulugon sa sulod sang isa ka unit sang YBL nga halin sa syudad sang Gensan.
Ini ang ginkumpirma sa Bombo Radyo Koronadal ni Mr. Bernard Bolanio, Operation’s Manager sang YBL Inc. sa interview sang Bombo Radyo Koronadal.
Suno sa iya, sakay ang amu nga lalaki sang biyahe nga halin sa Gensan pakadto sa syudad sang Koronadal apang bangud sa kahulugbon sini, natulogan ini sa sulod sang salakyan kag wala maka panaog.
Madasig naman ini nga ginpukaw sang guwardia sang terminal agud nga papana-ugon ini sa unit kay manug garahe na ini sang tion nga ato bangud isa pa manug alas-diyes naman sang gab-e.
Naalimpungatan suno pa ang suspek kag nagpangakig sa guwardia kag ginbuksan ang iya nga sling bag nga may unod nga armas.
Sa kahadlok, nagdalagan ang guwadia kag gin lagas man ini sa ng suspek.
Madasig naman nga nakapangayo sang bulig ang pamunuan sang YBL sa Koronadal CPS kag naarestar ang suspek.
Nakuha sa posisyon sini ang isa ka kalibre 45 nga pistola kag mga buhi nga bala.
Ginkilala naman ang suspek nga si Noe Valles Jacinto Jr., 29, single, kag residente sang Purok Rizal, Barangay Mabini , Koronadal City.
Sa karun, ara na sa kostudiya sang Koronadal CPS ang suspek kag maayo na lamang wala sang tension nga nagluntad samtang naga katulog ini sa sulod sang bus.
