Patay ang isa ka BPAT member matapos ini ginluthang sang pasado alas-12:30 sang udto sang Huwebes, Enero 1, 2026, sa isa ka resort sa bahin sang Sitio Kamanga, Brgy. Tasiman, banwa sang Lake Sebu, South Cotabato.
Ginkilala ang biktima sa kay Joel Blonto, 48 anyos, may asawa, miyembro sang BPAT, kag residente sang nasambit nga barangay. Pilason naman ang duha ka biktima nga sanday alyas “Efren”, 32 anyos, residente sang Purok 2 Proper, kag alyas “Lito”, 46 anyos, residente sang Sitio Kamanga, Brgy. Tasiman, sa nasambit nga banwa.
Samtang, ginkilala naman ang suspek sa kay alyas “Virgil”, 30 anyos, empleyado sang nasambit nga resort, kag residente sang Brgy. Polonuling, banwa sang Tupi, South Cotabato.
Sandig sa imbestigasyon sang Lake Sebu PNP, yara sa Merry May’s Resort ang mga biktima upod ang ila mga pamilya para sa isa ka family bonding sang matabo ang irinaway sa tunga sang tatlo ka biktima kag sang suspek nga nagtapos sa pagpaniro.
Gindala pa sa Lake Sebu Municipal Health Care Complex si Blonto apang gin-deklarar nga dead on arrival sang mga doktor.
Boluntaryo naman nga nagsurrender ang suspek nga si alyas “Virgil” sa Lake Sebu Municipal Police Station, dala ang isa ka unit sang caliber .45 nga pusil nga ginhalinan sa pagpaniro sa mga biktima.
