KORONADAL CITY – Gilayon nga ginpaidalom sa granular lockdown ang Brgy. San Isidro sa siyudad sang Koronadal makaligad nakapagkit sang positibo nga kaso sang covid-19.
Suno kay Koronadal City Health Officer, Dr. Editho Vego, ang nasambit nga pasyente isa ka 48 anyos nga lalaki kag residente sang Prk. Pagkakaisa, Urban.
Ang nasambit nga nagpositibo isa ka symptomatic patient kag may travel history halin sa General Santos City Fish Port nga kasamtangan nga ginpaidalom sa lockdown makaligad makapagkit sang covid 19 cases.
Gin-anunsyar ang nasambit nga granular lockdown kagab-i agud mapadasig ang ginahimo nga contact tracing sa mga nakasulapo sang nasambit nga positibo.
Ginlaygayan naman ang residente sang nasambit nga barangay nga magpabilin sa ila nga mga panimalay samtang ginapatigayon ang contact tracing.
Sa subong nakaisolate na sa facility sang siyudad ang nasambit nga nagpositibo kag kaupdanan sini sa ila puloy-an kalakip na ang duha ka bata.
Padayon naman ang pahanumdom ni Dr. Vego sa mga pumuluyo nga magdoble-ingat agud indi na maglapta pa ang makamamatay nga virus.
Samtang, nagsaka naman sa kabug-osan nga 485 ang kaso sang COVID 19 sa bug-os nga rehiyon 12 makaligad sang 23 ang mga kumpirmado nga kaso.
