Isa ka estudyante ang kumpirmado nga nagpositibo sa monkeypox sa South Cotabato.
Ini ang ginkumpirmar ni Mylene Seliote, HEPO III Koronadan City Health Office sa interbyu sang Bombo Radyo Koroandal.
Suno kay Seliote, ang nasambit nga pasyente indi taga Koronadal kundi halin sa isa ka tupad nga munisipyo.
Ginpahayag nga ang amo nga estudyante nagpa-admit sa ospital matapos nga nagpakita sang mga suspicious rashes sa lawas.
Ginkabig nga posible nga ang transmisyon natabo bangud sang iya madamo nga pagbyahe bangud naga eskwela lang ini sa syudad sang Koronadal kag nagapauli sa iya sini nga munisipyo.
Ginpunto man nga indi siya konektado sa duha ka nauna nga suspected cases sang nagligad nga semana kag isa ini isa ka bag-o nga kaso.
Sa karon, yara pa lang sa early stage sang amo nga balatian ang pasyente.
Ginahimo na sang mga otoridad ang contact tracing kag na-inform na ang mga close contacts sang estudyante, upod na ang iya eskwelahan.
Gina-monitor man subong ang mga posible niya nga nahimuan sang kontak sa balay kag sa iskul.
Wala pa naga labay sang isa ka semana ang sintomas sang pasyente, gani naagapan ini dayon sang mga health authorities.
Padayon ang DOH kag nagkalain-lain nga health authorities sa pagpaalinton sa publiko nga magpabilin nga alerto, mag-obserbar sang sintomas, kag magpa-konsulta gilayon kun may ginabatyag nga pareho sini.
