Iniulat ng Qatari Defense Ministry na tinamaan ng ilang missile mula sa Iran ang isang pangunahing gas facility sa hilagang bahagi ng Qatar.
Ayon sa ulat, target ng pag-atake ang mga pasilidad sa Ras Laffan Industrial City—isang mahalagang sentro ng Liquefied Natural Gas (LNG) sa bansa. Tinatayang nasa limang missile ang tumama sa lugar, kung saan isa ang direktang sumalpok sa isang kritikal na oil facility.
Sa ngayon, hindi pa tiyak ang kabuuang lawak ng pinsala, ngunit kinumpirma ng defense ministry na nagdulot ito ng malaking epekto sa mga gas facility, mga residente, at iba pang industriya sa lugar. Naiulat din ang malawakang sunog kasunod ng pag-atake.
Itinuring ng Qatari defense ministry ang insidente bilang isang seryosong banta sa pambansang seguridad ng Qatar.
Wala pa namang inilalabas na opisyal na pahayag ang pamahalaan ng Qatar kung paano ito tutugon o kung may gagawing hakbang na pagganti.
Nauna nang nagbabala ang Iran na maaari nitong targetin ang mga energy facility sa rehiyon, kasabay ng tumitinding sigalot sa Gitnang Silangan.
