Tinanggihan ni Iranian President Masoud Pezeshkian ang panawagan mula sa Washington para sa “unconditional surrender.”
Ito ay kasunod ng patuloy na paglala ng digmaan sa pagitan ng Iran, Estados Unidos, at Israel.
Sa isang talumpati na ipinalabas ng Iranian state television nitong Sabado, Marso 7, 2026, sinabi ng presidente na ang hinihingi ng U.S. ay isang “panaginip na dapat baunin sa libingan.”
Nasa kalagitnaan ng digmaan, nagising ang mga Iranian sa malalakas na pagsabog sa Tehran at iba pang mga lungsod habang nagpapatuloy ang malawakang opensiba ng U.S. at Israel.
Patuloy namang gumaganti ang Iran sa pamamagitan ng drone at missile strikes na tumatama sa mga target sa Israel at Gulf region. Sa Dubai, ilang pasahero ang napilitang magtago sa mga train tunnels dahil sa pangambang ma-atake.
Ayon sa mga ulat, si U.S. President Donald Trump ay naglabas ng pahayag sa Truth Social na walang magiging kasunduan sa Iran maliban sa kanilang “unconditional surrender.”
Kasabay nito, inanunsyo ng U.S. at Israel na lalo pang paiigtingin ang kanilang military operations laban sa Tehran.
Sa Lebanon, lumala rin ang sitwasyon matapos masangkot ang Hezbollah, na kaalyado ng Iran, sa palitan ng putok laban sa Israel.
Ayon sa UN refugee agency, nagiging isang “major humanitarian emergency” na ang kalagayan sa rehiyon.
Sa kasalukuyan, umabot na sa ikalawang linggo ang digmaan at wala pang nakikitang senyales ng pagtigil. Ang pagtanggi ni Pezeshkian ay nagpapakita ng determinasyon ng Iran na ipagpatuloy ang laban, sa kabila ng matinding pinsala at pagkamatay ng kanilang pinakamataas na lider, si Ayatollah Ali Khamenei, sa mga naunang airstrikes.
