Nagapanawagan ang Vatican sa Iran nga indi na pagdayunon ang anuman nga plano agud magtimalos sa Israel para indi na maglala pa ang tensyon sa Middle East.
Angot diri, nagestoryahanay sa telepono sanday Vatican Secretary of State Cardinal Pietro Parolin kag bag-o nga Presidente sang Iran nga si Masoud Pezeshkian agud hatagan importansya ang paghinun-anon, negotiation kag peace.
Ginpahayag ni Vatican spokesman Matteo Bruni nga luyag sang Cardinal nga indi na maglala ang tensyon sa Middle East kag panumdumon sang Iran ang mahimo mangin epekto sang giyera ilabi na sa mga sibilyan.
Ini matapos ginsiling ni Iranian supreme leader Ayatollah Ali Khamenei sa ila official website nga ang pagtimalos kabahin na sang ila “duty” kasunod sang assassination sang Hamas political leader nga si Ismail Haniyeh sa Tehran sang July 31.
Madumduman, makapila ka beses man nga naghingyo si Pope Francis sa iya misa nga dapat likawan na ang anuman nga tensyon sa Middle East.
