Ginpakita sang Iran ang kabakod sa pagpang-atake batok sa Israel matapos ang pahayag ni U.S. President Donald Trump nga nagaubos na ang pasensya sang Amerika.
Sa ika-anum ka adlaw sang giyera, naglunsar liwat ang Iran sang mga hypersonic kag long-range missiles bilang sabat sa ginaduda nga pag-atake sang Israel sa internal security headquarters sang Iran sa Tehran.
Sa isa ka televised speech, ginpahayag ni Supreme Leader Ayatollah Ali Khamenei nga hindi magsurender ang Iran kag ginbato niya ang panawagan ni Trump para sa “unconditional surrender.”
Suno sa iya, “wala sing kaluoy nga ipakita sa Zionist nga rehimen” kag dapat sabton ini sang mabaskog nga pamatok.
Ginpahibalo sang Iranian state TV nga Fattah hypersonic missiles kag iban pa nga mabaskog nga armas ang ginlunsar sang Islamic Revolutionary Guard Corps.
Sa pihak nga bahin, ginpahayag sang Israeli military nga masobra 400 ka ballistic missiles kag 1,000 ka drones ang ginpalupok sang Iran halin sang Biyernes.
20 ka missiles ang nagtupa sa mga sibilyan nga lugar sa Israel.
Wala pa kasiguraduhan kon magabulig ang Amerika sa pagbomba sa Iran, apang suno kay Trump, posible nga magresulta ini sa pag-iban sang poder sang gobyerno sa Iran.
