KORONADAL CITY- Nagpaandam sa subong ang Integrated Provincial Health Office (IPHO) South Cotabato sa sin-u-man nga mabiktima sang rabies nga indi magpabulong sa tradisyunal nga paagi ukon ginatawag nga tandok.
Ini makaligad nga makumpirmar ang kamatayon sang 3 katawo bangud sa rabies sa probinsiiya nga mga residente sang banwa sang Lake Sebu, Banga kag Tupi.
Suno kay John Codilla, rabies provincial focal person sang IPHO-SoCot, tanan nga mga biktima nga wala nagpabakuna sang anti-rabies, sa baylo nagpabulong ang mga ini paagi sa “tandok”.
Ang tandok ang isa ka tradisyunal nga paagi sang pagbulong kun diin ginakuha ang rabies sa lawas sang tawo paagi sa pagsupsop sa pilas usar ang sungay sang sapat.
Dugang pa ni Codilla nga indi epektibo ang tandok ukon anuman nga tradisyunal nga paagi kasubong na lamang sang pagpainom sang lana sang lubi sa mga biktima sang kagat sang sapat.
Kadungan sini, gin-awhag ni Codilla ang mga pumuluyo sa probinsiya nga magpaidalom sa anti-rabies vaccine sa baylo nga magpadulong sa mga albularyo.
