KORONADAL CITY- Ginreklamo ni Indigenous People’s Mandatory Representative Dominggo Collado ang isa ka pharmacist sang
Municipal Health Center sang Tampakan, South Cotabato makaligad suno pa nga nangin pabaya ini sa iya nga serbisyo.
Sa ekslusibo nga interbyu sang Bombo Radyo Koronadal kay IPMR Collado, nagpadulong suno pa ini sa health center sang iya nga banwa agud makapangayo sang bulong makaligad nga magtaas ang iya nga blood pressure.
Ginpapahuway sya sang isa ka oras ni Tampakan Health Officer Dr. Arlene Cardos kag makaligad sini, ginlaygayan sya nga magpangayo sang bulong sa pharmacy.
Gilayon naman sini nga ginhatag sa pharmacist ang resita sang doktor apang ginpangitaan ini sang referral apisar yara sa emerhensya nga kondisyon kun sa diin gin-insister ni IPMR Collado nga kinahanglan nya nga makainom sang bulong bangud tuman kalain ang iya pamatyagan.
Yaea na suno pa sa kamot sang pharmacist nga si Norilyn Tajanlangit ang bulong apang ginbalik niya ini sa surudlan kag naglakat nga wala naglisensya.
Gindangat nalang gilayon sa pribado nga balay bululngan ang IPMR makaligad ang panghitabo apang maayo na lamang kag nahingagaw ini.
Igapatawag naman sa Sangguniang Bayan ang si Tajanlangit agud magpaathag.
