KORONADAL CITY – Indi lamang peke nga pasaporte ang ginausar sang mga Indonesian terrorists sa pagsulod sa nagkalain-lain nga lugar sa Rehiyon 12 kundi ang iban sa mga ini ang totally undocumented.
Ini ang ginkumpirmar ni Police Chief Supt. Marcelo Morales, Regional Director sang PNP-12 sa interbyu sang Bombo Radyo Koronadal.
Suno kay Morales, madamo sa mga Indonesian nationals na ang ila nga nadakpan nga naga-agi sa coastal areas sang Rehiyon Dose kag indi lamang sa General Santos City.
Lakip sa mga naarestar nga mga Indonesian terrorist amo si Musola Rasim alyas Abu Amar nga may kaangtanan sa Bali bombing kag iban pa nga kalakasan sa nasambit nga pungsod.
Maluwas diri, naarestar man suno ang mga nagapakuno-kuno nga smuggler sang goods kasubong sang sigarilyo sa coastal area sang Glan, Saranggani province kag Palimbang, Sultan Kudarat.
Nakilal-an suno pa nga mga Indonesian nationals ang mga ini angud sa mga ID nga ginausar sa nasambit nga pungsod.
Suno pa sa opisyal, ini ang rason kun ngaa nagapadayon ang ila monitoring sa mga coastal areas sa bug0os nga rehiyon agud malikawan ang pagsulod pa sang mga terorista ilabi na ang mga kaalyado sang BIFF kag ISIS-ispired groups.
Una diri, nagpahayag sang pagkaalarma si Maguindanao Rep. Zajid Mangudadatu sa presensya sang mga Indonesian nationals sa Mindanao nga may peke nga Philippine passports nga ginapatihan upod sa pagpang-atake sa Marawi Ciy sang nakaligad nga tuig.
