KORONADAL CITY – Gin-awhag ni DENR Secretary Roy Cimatu ang mga opisyal kag pumuluyo sang Region 12 nga indi pagpabay-an nga maguba ang ginapabugal nga tourist attraction nga Saranggani Bay kag white beach in Mindanao nga Gumasa.
Ini ang hingyo ni Secretary Cimatu kadungan sang iya nga pagbisita sa rehiyon bilang dinapit nga bisita sang 1st Saranggani Bay Stakeholders Summit.
Suno sa opisyal, indi kuntani pagpabay-an sang mga opisyal nga mangin kasubong ang Saranggani Bay sa polluted nga Manila Bay kag ang Gumasa naman sa Boracay.
Gin-insister man sang opisyal nga subong pa lamang indi na dapat nga pahanugutan ang pagpatukod sang puluy-an sang mga informal settlers ukon commercial establishment sa dagat agud nga indi mangin polluted ang tubig.
Mas temprano nga aksiyon ang sabata sa pagsagop sa mga tourist destination sang region 12 nga mangin mahigko kag mangin kasubong sa Manila Bay kag Boracay.
Wala man sang iban nga tawo nga makapreserbar kag makaatipan sa nasambit nga mga tourist destination kundi ang mga pumuluyo mismo.
Sa subong kumpiyansa si Cimatu nga yara sa maayo pa nga kondisyon ang Saranggani Bay kag Gumasa sa banwa sang Glan.
