Nagapati si anay Supreme Court (SC) Senior Associate Justice Antonio Carpio nga isa ka manami nga desisyon ang indi paglakip kay Atty. Harry Roque sa legal team ni anay Presidente Rodrigo Duterte.
Una na ginpahayag ni Vice President Sara Duterte nga indi kaupod si Roque sa legal team sang anay presidente sa piyak sang pagpakita sini sa pag-atubang sang anay presidente sa Pre-Trial Chamber sang International Criminal Court (ICC).
Ginapunto sang anay mahistrado, may mga conflicting statement si Roque batok sa anay presidente antes siya nagsilbi bilang spokesperson.
Ginhalimbawa sini ang una nga pahayag sang anay presidential spokesperson nga nagapanikas sa extrajudicial killings (EJK), ilabi na sang ginadepensahan pa niya ang mga nasambit nga biktima sang EJK.
Suno kay Justice Carpio, isa ka dako nga problema sa kampo sang anay presidente kun ipresentar sang prosecution ang mga una nga statement ni Roque sa hearing nga pagahimuon sang ICC kag posible nga maging rason pa sang pagka-convict sang anay presidente.
Bangod sini, isa ka manami nga desisyon ang ginhimo nga pagkakas sa iya sa legal team sang anay presidente, antes paman mag-umpisa ang hearing sa kaso ni Duterte nga crimes against humanity.
Si Atty. Roque ang isa sa mga ginkilala nga human rights lawyer sa Pilipinas kag isa sa lima nga abogado sang pungsod nga may accreditation sang ICC.
