KORONADAL CITY – Halos indi pa mabaton sang iloy sang mag-utod nga napatay sa pag-arado sang isa ka pick-up truck nga service vehicle sang Bureau of Fisheries and Aquatic Resources ukon BFAR XII sa national highway sang Barangay Saravia, Koronadal City sang nagligad nga gab-i.
Sa eksklusibo nga interview sang Bombo Radyo Koronadal kay Nanay Solen Hilaria, iloy sang mag-utod nga Vivian kag Rhealy, tuman kasakit ang natabo sa mga bata sini.
Suno sa iya madamo pa kuntani sang handum ang iya mga bata kun makatapos na ang mga ini sa pag-eskwela apang nautod lamang kag indi na matigayon pa bangud patay na ang mga ini.
Dugang pa ni Nanay Solen indi niya mahibaluan kun sa ano mabaton ang natabo bangud kasubong nga nadulaan man siya sang kabuhi sa pagkapatay sang duha ka mga dalaga sini.
Sa pagkamatuod ginbalik-lantaw nya pa kun ano kabuot ang mga ini, nagabaligya sang kun-ano-ano para makabulig sa pamilya, naga-eskwela sang maayo agud makatapos kag nangin timbang nya sa mga hilikuton sa sulod sang balay.
Apang bangud wala na ang mga ini, nadula naman ang iya paglaum nga makatibawas sa kapigaduhon.
Nahibaluan nga nakig-settle na ang ila pamilya sa driver sang BFAR XII nga amo ang responsable sa kamatayon sang iya mga bata.
Apang, gin-athag ni Nanay Solen nga indi suno pa mabaydan sang bisan ano nga kantidad sang kwarta ang kabubi sang mga bata sini.
