KORONADAL CITY – Hugot nga ginadumilian sang pamunuan sang sikat nga Divine Mercy Shrine sa banwa sang Lake Sebu, South Cotabato ang pagtulog sang mga indi kasal ukon indi mag-asawa subong nga Holy Week.
Ini ang ginkumpirmar ni Lake Sebu tourism officer Leslie Boclares sa interbyu sang Bombo Radyo Koronadal.
Suno kay Boclares, ginalauman na ang pagdagsa sang mga bakasyunista subong nga Biyernes Santo sa mga matahum nga lugar sa ila nga banwa kag kalakip na dira ang Divine Mercy Shrine.
Apang, gin-insister ni Boclares nga kaugalingon nga polisa sang nasambit nga lugar ang pagdumili sa mga magkarelasyon ukon sin-uman nga magkapareha nga indi kasal nga matulog sa ila nga mga accommodation rooms.
Nahibaluan nga madamo ang nagadayo sa nasambit nga lugar bangud sa dako nga estatwa ni Hesukristo nga suno pa nagahatag sang healing power sa mga nagabisita didto.
Magluwas sini, malinong kag mabugnaw man ang lugar nga pabor para sa mga luyag magpahuway, magpamalandong kag mangamuyo subong nga Holy Week.
