Dumating sa Pilipinas ang tanker na Sara Sky, may bandila ng Sierra Leone, na may dalang humigit-kumulang 100,000 tonelada ng Eastern Siberia–Pacific Ocean (ESPO) crude oil mula sa Kozmino port ng Russia, na nakatakdang iproseso sa refinery sa Bataan. Ang barko ay nakarating sa Limay port dakong alas-dos ng hapon nitong Martes, Marso 24.
Ito ang kauna-unahang pag-angkat ng langis mula Russia ng bansa mula pa noong 2021. Ayon sa mga ulat, pinili ng Pilipinas na muling umangkat ng Russian oil dahil sa pangamba sa kakulangan ng suplay dulot ng patuloy na tensyon sa Strait of Hormuz, kung saan nagkakaroon ng alitan ang Iran at Estados Unidos.
Malaki ang pag-asa ng bansa sa langis mula sa Middle East, kaya’t ang anumang sagabal sa rehiyon ay agad nakaaapekto sa presyo at suplay. Sinabi ni Energy Secretary Sharon Garin na bukas ang pamahalaan sa lahat ng opsyon, kabilang ang pakikipag-ugnayan sa Russia, Thailand, Japan, at Singapore para sa alternatibong suplay.
Ang pagdating ng shipment ay naganap sa loob ng 30-araw na window na pansamantalang nag-alis ng US sanctions sa Russian oil, na magtatapos sa Abril 11. Kasabay nito, nagdeklara si Pangulong Ferdinand Marcos Jr. ng national energy emergency sa pamamagitan ng executive order upang mas mabilis na makapagtugon sa krisis.
Kabilang sa mga hakbang ang fast-tracked fuel procurement, advance payment para sa mga kontrata, at pagtutok sa tuloy-tuloy na suplay ng langis at iba pang pangunahing produkto na apektado ng pagtaas ng presyo. Inaasahan namang agad mararamdaman sa merkado ang dagdag na supply, lalo na sa transportation sector na matagal nang umaangal dahil sa sunud-sunod na pagtaas ng presyo ng mga produktong petrolyo.
