Importasyon sang karne sa pungsod ginapaabot nga makaabot sa bag-o nga record high

Makaabot sa bag-o nga record high ang importasyon sang karne sa pungsod.

Sa bulan pa lang sang Setyembre, nakaabot na sa isa ka milyon metric tons ang mga import bangud sa pagsaka sang mga nagabakal sang karne sang baboy kag manok.

Suno sa Bureau of Animal Industry (BAI), ang mga importasyon sang karne halin Enero tubtob Setyembre nakaabot na sa 1.039 milyon metric tons.

Mas mataas ini sang 12.64 porsyento kon ikumpara sa pareho nga bulan sang nagligad nga tuig.

Ang siyam ka bulan nga volume ang may 165,000 metric tons lang nga kulang para mapareho ang full-year meat import volume sang 2023 nga may 1.204 milyon metric tons.