Ginpahayag ni Senate President Sherwin Gatchalian nga may yara na sang consensus ang mga senator-judges nga ibalik sa hapon ang impeachment trial ni Vice President Sara Duterte.
Katuyuan sini nga mapadasig ang mga hearing kag malikawan ang padayon nga pagsuspend ukon pagpaiway sang trial.
Suno kay Gatchalian, limitado ang oras kun aga ginahimo ang trial bangud kinahanglan ini suspender angot sa regular nga sesyon sang Senado sa hapon.
Ginsuhestyon man ni Senator-Judge Migz Zubiri nga himuon sa aga ang legislative session kag ang impeachment trial halin alas-3 sang hapon tubtob gab-i.
Paagi sini, mas madamo nga oras ang mahatag sa prosekusyon kag depensa para mapresentar ang ila mga argumento.
Antes sini, ginahimo ang trial halin alas-10 sang aga tubtob alas-2 ukon alas-3 sang hapon.
Bangud sa kakulangan sang oras, ang pagpamangkot sa mga testigo masami nga mautod kag nagalawig ang hearing.
Ang mga testigo nga dapat isa lang ka adlaw ang pag-atubang sa trial nagalawig pa gani tubtob tatlo ka adlaw.
Ginalauman nga paagi sa bag-o nga iskedyul, mas madasig matapos ang trial kag makabalik ang Senado sa ila regular nga buluhaton.
