Posibleng ipagpatuloy pa rin ng Senado ang impeachment proceedings laban kay Vice President Sara Duterte sa kabila ng desisyon ng Korte Suprema na nagsasabing unconstitutional ang Articles of Impeachment laban sa Bise Presidente.
Sa panayam ng Bombo Radyo Koronadal, sinabi ni Professor Danilo Arao, Associate Professor ng Department of Journalism sa University of the Philippines Diliman, na maaaring igiit ng Senado ang kanilang legislative independence at ituloy ang proseso bilang impeachment court kung pananaw nila ay para ito sa kapakanan ng sambayanan.
Ayon pa kay Arao, dapat ay hinayaan na lamang ng Korte Suprema ang Senado na magdesisyon sa kaso dahil tanging ang Senado lamang ang may kapangyarihan na humatol sa mga kaso ng impeachment laban sa mga opisyal ng gobyerno, kabilang na ang Bise Presidente. Giit niya, wala ring konkretong kapangyarihan ang SC para ipatigil ang proseso kung ito ay hindi susundin ng Senado.
Babala pa ng propesor, maaaring humantong sa isang constitutional crisis ang sitwasyon kung magpapatuloy ang impeachment trial sa kabila ng desisyon ng Korte Suprema.
Matatandaang nagbabala rin si Senate President Juan Miguel Zubiri na posibleng magkaroon ng “constitutional crisis” kung isusulong pa rin ang impeachment proceedings laban kay VP Duterte. Ayon sa kanya, delikado ito sa sistema ng checks and balances na pundasyon ng demokrasya sa bansa. Nanawagan din si Zubiri ng respeto sa naging desisyon ng Korte Suprema.
