KORONADAL CITY –Abre ang talatapan sang PNP sa pagpatigayon sang NBI sang separar nga imbestigasyon sa nagluntad nga shoot-out nga nag resulta sang pagkapatay sang 2 ka katapo sang mga kapulisan kag mag-utod nga Papna kun sa diin ,isa sa mga ini ang may standing nga warrant of arrest sa kaso nga murder.
Ini ang nangin pahayag ni PLt.Col Realan Mamon, hepe sang M’lang MPS sa interview sang Bombo Radyo Koronadal.
Suno sa iya, ginakasubo nila ang pagkapatay sang 2 ka intel operatives sang Kidapawan PNP sa nagluntad nga shoot out sa bahin sang Prk. Uni, Barangay Bialong, M’lang ,North Cotabato.
Ginkilala sang hepe ang mga pulis nga napatay nga sanday Police Chief Master Sgt. Fletcherlyn Dominic Pido kag Police Staff Sgt. Arman Alquiza Bada.
Nagpanindugan naman si Mamon nga lehitimo nga operasyon ang ginpatigayon sang 2 ka pulis bangud nakig-angot sila, angot sa surveillance operation sang mga ini batok sa mag-utod nga negosyante nga sanday John Kevin Papna, 26 anyos kag Jerson Papna, 35 anyos, nga lunsay residente sang nasambit nga lugar kag subject sang warrant of arrest sa kaso nga murder.
Kaangot sini, luyag naman sang mga kapulisan ang madalum nga imbestigasyon kun may iban pa nga suspek nga naulamid sa nasambit nga insidente.
