KORONADAL CITY — Padayon ang ginahimo nga imbestigasyon sang Bureau of Fire Protection (BFP) may angut sa nagluntad nga sunog sa Purok Triniville, Block 1, Barangay Zone 4 sa syudad sang Koronadal kahapon, adlaw sang Lunes, Enero 12, 2026.
Sa interview sang Bombo Radyo Koronadal kay SFO1 Alexander G. Alinsugay, Chief sang Intelligence and Investigation Unit sang BFP Koronadal, ginpahayag sini nga nakabaton sila sang report alas 3:55 sang hapon angut sa isa ka balay nga nasunog.
Gilayon man nga nagresponde ang mga bombero sa lugar agud mapalong ang kalayo kag malikawan ang paglapta sini sa mga kalapit nga panimalay.
Suno kay SFO1 Alinsugay, naglab-ot sa P3,750 pesos ang kabug-osan nga danyos sa nasunog nga puluy-an bangud madamo nga mga gamit ang nadala sang kalayo.
Wala naman sang may ginreport nga nanapilsaon ukon napatay sa nasambit nga insidente.
Nagpanawagan man si SFO1 Alinsugay sa publiko nga mangin mapanubli kag mangin mabinantayon sa ila mga panimalay, ilabi na ang pagsiguro nga wala sang mga naka-on ukon naka-saksak nga electrical appliances kun maghalin sa balay.
Samtang, gin-awhag man niya ang mga pumuluyo nga mag-report gilayon sa BFP kun may magluntad nga insidente sang sunog agud masiguro ang madali nga pagresponde kag malikawan ang mas dako nga danyos.
