KORONADAL CITY – Nakahaya na subong ang isa ka iloy matapos nga ginbawian sang kabuhi bangud sa pagkalumos sa suba makaligad nga ginsagop sini ang iya isa ka 7-anyos nga bata sa probinsiya sang Sultan Kudarat.
Ginkilala ni Police Captain Roberto Trinidad, hepe sang Senator Ninoy Aquino Municipal Police Station, ang biktima nga si Nancy Cantem, 33 anyos nga residente sang Barangay Kiadsam, SNA, Sultan Kudarat.
Suno kay Trinidad, nagtabok sa suba ang biktima kaupod ang iya bata nga 7-anyos nga nag-agi sa taytay apang nadanlog ang bata sini kag nahulog sa suba raspn nga gintinguhaan niya ini nga maluwas.
Apang sa baylo nga maluwas nahulog man sa suba ang iloy kun diin bangud sa mabaskog nga current sang tubig gin-anod ini kag nalumos.
Maswerte naman nga nakaluwas ang bata sa bulig sang isa ka mangunguma nga nakakita sa insidente.
Pila ka oras man ang ginpatigayon nga rescue operation agud nga maluwas ang biktima apang bangkay na ini sang masapwan.
