Ginkumpirmar ni ACT Teachers party-list representative France Castro nga ipasaka na sa masunod nga semana ang ikatatlo nga impeachment complaint batuk kay Vice President Sara Duterte.
Suno kay Castro, religious groups ang magapasaka sang panibag-o nga reklamo batuk kay Duterte.
Samtang, wala naman gindetalye ni House Secretary General Reginald Velasco kun ano nga “religious group” ang magapasaka sang impeachment batuk sa bise presidente.
Madumduman nga ang una nga impeachment complaint ang gin-endurso ni Akbayan Party-list Representative Perci Cendaña.
Bangud ginakulabos na sang tiempo, aminado naman si Castro nga indi sa gilayon mapasa sa Senado ang impeachment complaint batuk kay Duterte.
Samtang sa separado nga mensahe, gin-abi abi ni Vice President Duterte ang ginpasaka sa iya nga impeachment kag nagpabutyag sang kahandaan nga atubangon ini.
