Viral sa social media ang sitwasyon sang isa ka idik kun sa diin, duha lang ang ti-il sini kag duha man ang gender.
Sa pihak sang kasablagan, nagalakat kag nagatindog gihapon si “Lucky” nga ginbun-ag sang Enero.
Suno sa tag-iya nga si Maricel Holgado, si Lucky ang una nga idik nga naggwa sang nagbun-ag ang ila nayon.
Bisan nga kulang ang ti-il, luyag gihapon sang idik nga maglakat kag masarangan niya ini pinaagi sa pagbalanse agud makatindog gamit ang duha sini ka ti-il sa atubangan.
Suno kay Dr. Aris Miclat, veterinary pathologist, ginatawag ini nga Bilateral Hindlimb Amelia nga posible resulta sang genetic mutation, problema sa pag-develop sang embryo, impeksyon ukon kakulangan sa nutrisyon sang nayon samtang nagabusong, ukon pagka-expose sa toxins ukon kemikal.
Magluwas sini, luyag ni Maricel nga ma-athagan man kun ngaa may kinatawo kag alatrasan si Lucky.
Suno kay Miclat, posible isa ka lalaki nga pseudohermaphrodite ang idik base sa iya nakita sa video.
Bangud sa sitwasyon ni Lucky, madamo ang interesado nga baklon ini apang wala nila ini ginabaligya kag gusto sang tag-iya nga sagudon ini.
