Nagsumiter ang Prosecutor sang International Criminal Court (ICC) sang ikaduha nga batch sang ebidensya batok kay anay Presidente Rodrigo Duterte, nga gina-imbestigaran bangud sa mga krimen batok sa katawhan may kaangtanan sa iya brutal nga kampanya kontra droga.
Sa dokumento nga ginpadala ni ICC Prosecutor Karim Khan sa Pre-Trial Chamber I sang ICC sang Mayo 5, ginpahayag nga ang bag-o nga ebidensya ginpadala sa depensa ni Duterte sang Abril 30, 2025.
Ang una nga batch sang ebidensya ginpasaka pa sang Marso.
Suno kay Khan, ang 139 kabilog nga ebidensya gin-organisar sa apat ka disclosure packages, nga nagalakip sang mga: contextual elements, modes of liability, mga kaso sang pagpatay samtang si Duterte ang alkalde sang Davao City, kag mga pagpatay nga ginpatigayon pinaagi sa barangay clearance operations sa iya termino bilang presidente.
Ginalauman nga magaatubang si Duterte sa pagapahamtang nga preliminary hearing sa Setyembre 23 agud kumpirmahon ang mga pasibangod batok sa iya.
