KORONADAL CITY – Plano nga pasakaan sang mga kaso sang isa ka pulis ang utod sang isa ka barangay kagawad nga nagsumbag sa iya sa banwa sang Tboli, South Cotabato.
Ginpahayag ni PCInsp Ramil Villagracia, hepe sang Tboli PNP sa interbyu sang Bombo Radyo Koronadal nga base sa ila imbestigasyon, hubog suno pa ang barangay kagawad nga si Carlito Pradilla sa isa ka pyesta sa Brgy Sinolon kag sang ginsaway ini sang mga pulis, mas nagmaoy pa ini rason nga liwat siya ginhambalan ni PO1 Ramisis Agar.
Samtang nagaistoryahanay ang duha, nag-abot ang utod sang kagawad nga si Felixberto Pradilla kag gilayon nga ginsumbag si PO1 Agar.
Nagdulom suno pa ang panan-awan ni Agar kag sa pagpati nga patyon siya, gin-unahan niya si Felixberto pinaagi sa pagluthang sa iya.
Sa subong yara sa isa ka pribado ka ospital si Felixberto samtang igasaylo si Agar sa Regional Personnel Holding Administration Unit (RPHAU-12) para sa dugang nga imbestigasyon.
Kaso nga assault upon an agent of person in authority kag attempted murder ang igasang-at ni PO1 Agar.
Suno kay Villagracia, pagarespetuhon nila ang kaso nga igasang-at sang mga Pradilla bangud kinamatarong man nila ini.
