Ginakonsiderar sang House prosecution panel si anay Department of Education (DepEd) Assistant Secretary kag spokesperson Atty. Michael Poa bilang hostile witness sa impeachment trial ni Vice President Sara Duterte.
Suno kay House trial spokesperson Rep. Zia Alonto Adiong, importante nga testigo si Poa sa isyu sang confidential funds sang DepEd sang panahon nga secretary pa si Duterte.
Si Poa isa sa mga opisyal nga nagsabat sa mga Audit Observation Memoranda (AOM) sang Commission on Audit (COA) may kaangtanan sa paggamit sang confidential funds sang DepEd.
Ginpahayag ni Adiong nga mahimo makabulig ang testimonya ni Poa sa pagpaathag kon paano ginaatubang sang DepEd ang mga audit findings kag mga dokumento nga may kaangtanan sa amo nga pondo.
Gintupong man ni Adiong si Poa kay OVP Assistant Secretary Lemuel Ortonio, nga una na nga ginpresentar sang prosecution bilang hostile witness.
Apang ginpahayag niya nga ang impeachment court gihapon ang may katapusan nga awtoridad sa pagdesisyon kon kwalipikado si Poa nga ideklarar bilang hostile witness.
Ang isyu sang DepEd confidential funds kabahin sang Article I sang impeachment complaint, nga nagatalakay sa ginapahayag nga sayop nga paggamit, pag-usik kag iregularidad sa liquidation sang confidential funds sa OVP kag DepEd.
