Nakatalana nga tapuson sang House Committee on Good Government and Public Accountability ang imbestigasyon sini angot sa mali nga paggastos ni Vice President Sara Duterte sa P612.5 milyon nga confidential funds sang Office of the Vice President (OVP) kag Department of Education (DepEd) nga dati niya ginapamunuan.
Nakalunsar sang pito ka hearing sang komite kung sa diin nadiskubre ang mga iregularidad sa paggamit sang confidential funds ni Duterte kaupod na ang P125 milyon nga naubos sa sulod lang sang 11 ka adlaw.
Ang paggasta sang OVP sang P16 milyon confidential funds sini pagrenta sang 34 ka safehouse sa sulod sang 11 ka adlaw sang Disyembre 2022 kag ang P15 milyon confidential fund sini sa youth leadership summits sang Philippine Army nga ginpanigwala sa ulihi.
Natukiban sa imbestigasyon ang pagdawat ni “Mary Grace Piattos” sang confidential funds.
Madumduman duha ka impeachment complaint ang ginpasaka batok sa bise presidente sang nagligad nga semena kag kaupod na diri ang mali nga paggasto sang nasambit nga confidential fund.
Suno naman kay Joel Chua nga posible gamitun sang House Committee on Justice ang mga impormasyon nga nakolekta sang sang komite kung kinanglan sa igahimuon sini nga hearing sa mga impeachment complaint.
