Nagpaandam ang House committee on good governance sa pito ka opisyal sang Office of the Vice President (OVP) nga arestuhon sila kun liwat sila nga mag-absent sa hearing sang gina-alegar indi insakto nga paggamit sang pondo sang publiko.
Suno kay panel chair Manila 3rd District Rep. Joel Chua, nag-issue sila sang madamo nga summon sa pito ka OVP officials nga wala nagsapak sang ila request nga magtambong sa hearing.
Ginbuyagyag ni Chua nga sanday Administrative and Financial Services Director Rosalynne Sanchez kag OVP Chief Accountant Julieta Villadelrey pa lamang ang nagkumpirmar nga magatambong sila sa hearing nga natalana Lunes, Nobyembre 11.
Ang House panel ang naga-imbestigar sa gina-alegar misuse sang P612.5 million sa confidential funds nga gin-alokar sa OVP kag sa Department of Education (DepEd) sa idalom ni Vice President Sara Duterte.
Magluwas kanday Sanchez kag Villadelrey, ang mga masunod nga opisyal ang wala man nagtambong sa hearing sang panel sang Nobyembre 5:
OVP Chief of Staff Zuleika Lopez
Assistant Chief of Staff and Bids and Awards Committee Chair Lemuel Ortonio
Special Disbursing Officer (SDO) Gina Acosta
Former DepEd Assistant Secretary Sunshine Charry Fajarda
SDO Edward Fajarda
Si Lopez ang ginpahayag nga nagpadulong sa Los Angeles sang Nobyembre 4.
Suno sa Department of Justice (DOJ), nagpagwa na sila sang immigration lookout bulletin order (Ilbo) batuk sa pito ka opisyal kasunod sang request sang panel.
