Nagpanawagan si Sen. Risa Hontiveros sang madali nga pagsiguro sa kaluwasan sang mga Pilipino sa Middle East, lakip ang paghatag sang klaro kag madasig nga mekanismo para sa repatriation nga may igo nga pondo kag maayo nga koordinasyon sang Department of Migrant Workers kag Department of Foreign Affairs.
Ginpabutyag man niya ang panginahanglan sang contingency plans para sa palangabuhian sang mga OFW kag para sa posible nga epekto sang nagalala nga krisis sa suplay sang oil kag gas sang Pilipinas.
Bangud sini, ginpanawagan niya ang Department of Energy nga magpatuman sang short-term safeguards samtang ginahimo ang komprehensibo kag pangmalawigon nga energy plan agud maproteheran ang mga konsumidor kag industriya batok sa pagsaka sang presyo kag kulang sang suplay.
Samtang, nagalaum si Hontiveros nga magahulag ang United Nations para sa de-escalation kag pagbalik sa diplomasya, samtang ginpahayag niya ang kabalaka sa ginapahayag nga padayon nga paglala sang kinagamo nga gina-imbolbaran sang administrasyon nanday Donald Trump kag Benjamin Netanyahu kag ang mga pag-atake sang Iran sa pila ka Gulf States.
