Nagpaguwa sang opisyal nga pahayag ang konsulada sang Pilipinas sa Hong Kong kaangot sa mga nagakatabo sa nasambit nga pungsod ilabi na sa nagapadayon nga mga bayolente nga hublag protesta.
Suno kay Consul General Raly L. Tejada apisar nagapabilin nga luwas ang kahimtangan sang mga Overseas Filipino Workers sa Hong Kong nakatutok sa gihapon sila sa sitwasyon sang mga ini bangud sa nagalapad nga mga hublag protesta nga nagaresulta sa riot sa tunga sang pro-democracy protesters kag Hong Kong riot police.
Gin-awhag naman ni Consul General Tejada ang mga Pinoy nga likawan anay ang mga matawo nga lugar agud indi maipit kag malamita sa mga demonstrasyon kag makig-angot sa ila kun may problema ukon luyag magpangayo sang bulig.
Samtang sa kasamtangan pwede sa gihapon makasulod kag makabiya sa Hong Kong ang mga OFW bangud operational pa ang airport apang gin-awhag sini ang mga turista nga luyag maglagaw kag magbakasyon sa Hong Kong halin sa Pilipinas nga indi anay magpadulong sa nasambit nga pungsod bangud indi sa gihapon estable ang sitwasyon kag sa baylo mas nangin magamo pa ang lugar.
