Ginsilutan ang anay Presidente sang Honduras nga si Juan Orlando Hernandez sang 45 ka tuig nga pagkabilango sa federal prison kag ginapabayad sang multa nga $8 milyon bangud sa pagpadalagan sang “narco-state” nga nagbulig padala sang South American cocaine sa United States.
Sang Marso, napamatud-an sang mga hurado sa New York nga guilty si Hernandez sa tatlo ka kaso sang drug trafficking matapos ang duha ka semana nga pagtratar sa Manhattan federal court.
Suno sa U.S. prosecutors, natukod ni Hernadez ang iya political career pinaagi sa minilyon ka dolyares nga bribe gikan sa mga drug traffickers sa Honduras kag Mexico.
Suno sa report, sa tion sang iya duha ka termino sadtong 2014 tubtob 2022, nagbulig ini padala sang halos 400 tonelada sang cocaine sa United States samtang ginaproteksyonan ang mga drug cartels gikan sa extradition kag prosecution.
Ginpanginwala naman sang anay presidente ang mga akusyasyon batok sa iya kag ginpahayag nga imbento lamang ang tanan.
