Nagapakita sang daku nga kabalaka ang Department of Health (DOH) matapos maitala ang masami nga pagtaas sang kaso sang Human Immunodeficiency Virus (HIV) sa mga kabataan sa Pilipinas.
Base sa pinakabag-o nga datos, naglab-ot ini sa 500% nga pagpasaka sang mga kaso sang HIV sa mga kabataan, nga ginakabig subong nga isa ka seryoso nga public health concern.
Suno sa DOH, ang pinakabata nga may yara sang HIV amo ang 12-anyos nga bata, amo nga ginapanawagan sang ahensya ang mas estrikto nga kampanya batok sa HIV, labi na gid sa sektor sang kabataan.
Ginkumpirma man nga ang Pilipinas subong ang may pinakamadasig nga rate sang pagdamo sang HIV cases sa bug-os nga kalibutan, kabangdanan nga ginatamod ini nga krisis nga kinahanglan tutukan sang gobyerno, komunidad, kag mga institusyon sa edukasyon.
Ginapadayon sang DOH ang pagpatuman sang mga programa kag kampanya nga nagatuyo nga mapunggan ang padayon nga paglapta sang virus. Kalakip sa ini amo ang libreng testing, awareness seminars, kag paghatag sang post-exposure prophylaxis (PEP) sa mga posible nga na-expose sa virus.
Gina-awhag man sang ahensya ang publiko ilabi na ang mga ginikanan, guardian, kag mga eskwelahan nga magpabakod sang edukasyon parte sa HIV/AIDS, kag maghatag sang husto, eksakto, kag age-appropriate nga impormasyon sa kabataan.
Ginklaro pa sang DOH nga hindi dapat kahuyaon ang pagpakig-angut sa health centers agud magpa-test ukon magpakonsulta.
Ang pagsabat sa problema sa HIV nagasugod sa kahibalo kag responsableng aksyon sang tanan.
Sa pihak sang kabudlayan, padayon ang panawagan sang DOH para sa kooperasyon halin sa publiko kag suporta halin sa lain lain nga sektor sa pagsabat sa padayon nga problema sang HIV sa kabataan.
