Gintanggihan sang Pasig RTC Branch 159 ang pangabay sang kampo ni KOJC Leader Pastor Apollo Quiboloy, nga tugutan ang pastor nga magpasulod sang bisita sa ospital.
Suno kay PNP PIO Chief PBGen Jean Fajardo, nakasulat sa mando sang korte sang November 13, 2024, nga isa lang ka tawo ang tugutan nga magbantay kay Quiboloy sa Philippe Heart Center kag bisan ang mga abogado sini indi man makasulod.
Gindala sang November 13 si Quiboloy sa Philippine Children’s Hospital agud magpa-test nga kinahanglan gamitan sang partikular nga kagamitan kag mga alas 9:10 p.m ginbalik lang man ini sa PHC.
Sa karon, yara pa sa ospital si Quiboloy, kag suno sa mando sang korte, magpabilin ang pastor sa ospital kag ibalik sa PNP Custodial facility sa Nob. 16 alas singko sang hapon.
Suno kay PBGen Fajardo, may pila ka medical abstract nga ginpadala sa PNP kag ginahulat lang nga matapos ang tanan nga test para sa findings kag masunod nga desisyon sang korte.
Samtang, indi man tugutan sang pambansang pulisya nga bag-uhon sang kampo ni Pastor Quiboloy ang detention room sini.
Ginpahayag man ni PBGen Fajardo nga Normal sa tanan nga selda nga wala sang aircon kag gin-insister nga wala sila sang special treatment sa bisan sin-o amo indi pwede nga bag-uhon ang detention room sini.
