KORONADAL CITY – Wala sang katungod nga magpangdakop sang mga motorista nga nagalapas sa traffic rules ang mga katapo sang Highway Patrol Group (HPG) sa buong Rehiyon Dose.
Ini ang pagpaklaro ni LTO 12 Regional Director Melharrieh Tomawis sa ginpatigayon nga pagsinapol sa diin ginpaathag sini nga wala pa ginhatagan sang deputization sang LTO ang Highway Patrol Group (HPG).
Suno sa Director, kasamtangan pa nga gina-plantsa sang LTO kag HPG ang pila ka mga issues nga naga patunga sa mga ini antes nga liwat nga tugutan nga hatagan sang Land Transportation Office-12 ang HPG sang deputazation sa pagpatuman sang layi sa trapiko.
Isa naman sa mga issues nga ginlantaw sang Land Transportation Office-12 ang korapsyon sa pila ka mga katapo sang Highway Patrol Group bangud sa reklamo sang mga nabiktima suno pa sang mga ini nga mga motorista.
Aminado naman ang Director nga kulang ang numero sang ila nga katapo agud nga ipatuman sang 100% ang mga layi sa kadalanan batok sa mga motorista nga nagalapas sa mga ini kag multahan base man sa penalidad nga nakatalana sa mga violations sang mga ini.
Sa kasamtangan, kaupod sang Land Transportation Office-12 ang kapulisan pinaagi sa pagpatigayon sang mga checkpoints sa mga mayor nga dalanon sang Rehiyon agud ipatuman sang mandato nga ila ginasunod sa katawhayan kag kalinong sa bilog nga Rehiyon Dose.
