KORONADAL CITY-Napatay sang mga otoridad ang isa ka persona nga naga tulod sang illigal nga droga sa bahin sang Purok Saranay 2, Brgy. Salunayan, Midsayap, Cotabato Province.
Ini ang ginpahayag ni Kath Abad ang spokesperson sang PDEA-12 sa interbyu sang Bombo Radyo Koronadal.Suno sa kay Abad sang nag umpisa ang bag-ong tuig may high-impact nga anti-narcotic operation kag naghiwat sang buy-bust operation ang joint operatives sang PDEA Cotabato Provincial Office, PDEA Sarangani Provincial Office, Midsayap MPS kag 34th sang January 5, 2022, 4:30PM sa Purok Saranay 2, Brgy. Salunayan, Midsayap, Cotabato Province.
Ang operasyon ang nag resulta sa pagka-neutralize sa suspek nga ginkilala kay Jacky Guimba y Manalac alyas “Datu” 23 anyos kag residente sang Pamalian Shariff Saydona Mustapha, Maguindanao nga hana pa kuntani nga magbato sa mga operatiba usar ang iya armas-luthang nga pistola.
Nakuha sa posisyon sang suspek ang napulo ka dalagkuan nga sachet sang ginapatihan nga shabu nga may kabug-aton nga ginabulubanta 500 gramo kag naga balor sang P3.4 milyon ka pesos, buy-bust money, cellular phone, motorsiklo.
Nakumpiska man sa suspek ang 45 nga calibre nga armas-luthang nga may serial number 478136 kag kargado sang magazine nga naga unod sang live ammo. Kalakip sa mga area of operation sang suspek ang Midsayap kag pipila ka mga munisipalidad sa Cotabato Province.
Gin dugang pa sang tigpamaba nga madugay na suno pa nga gina panaligan sang operatiba ang nasambit nga suspek kag gina konsidera man ini bilang isa ka High Value Target sang mga kapulisan bangud sa madamo sini nga areas nga gina supplayan sang ilegal nga droga.
