KORONADAL CITY – Hugot ang ginahimo nga monitoring sang Department of Health (DOH) Region 12 sa mga balay bulolngan kaangot gihapon sa isyu sang ginakabalak-an nga novel-coronavirus.
Ini makaligad nga ginbatak na sa high alert status sang nasambit nga talatapan ang tanan nga mga ospital kag medical facilities sa rehiyon bangud sa ginakabalak-an nga makamamatay nga balatian.
Ginpaathag ni DOH 12 Health Education and Promotion Officer Arjohn Gangoso, nga agud masabat ang nasambit nga problema sa ikaayong lawas, naghaanas na ang mga staff sang mga pampubliko kag pribado nga ospital sa bug-os nga rehiyon agud gilayon marespondehan ang sin-oman nga may ginapatihan nga may kaso sini.
Hugot man ang ila pagpakig-angot sa Bureau of Quarantine sa mga entry points sa rehiyon kalakip na ang mga pantalan, airport, kag mga terminal.
Dugang ni Gangoso nga apesar wala pa sang suspected cases ukon person under investigation (PUI) sang nCOV sa Soccksargen, dapat masami ang paghugas sang kamot kag healthy lifestyle agud makalikaw sa balatian.
Ginlaygayan naman sini ang mga kasimanwa nga nag-abroad kag natukiban nga may mataas nga hilanat, sip-on mabudlay ang pagginhawa kag ubo nga gilayon magpadulong sa pinakamalapit nga ospital ukon health center.
