KORONADAL CITY- Gin-awhag ni South Cotabato Police Provincial Director PSSupt. Joel Limson ang Securities and Exchange Commission ukon SEC kag Criminal Investigation and Detection Group ukon CIDG nga padasigan na ang imbestigasyon batuk sa Kabus Padatuon o KAPA investment scam nga naga-operate sa South Cotabato, General Santos City, Sarangani Province kag iban pa nga mga lugar.
Kasunod ini sang iya rebelasyon nga madamo sang mga pulis sa South Cotabato ang nagpamiyembro na sa nasambit nga grupo apisar klaro sa ginpagwa nga advisories sang SEC kag DILG nga iligal ang operasyon sang KAPA.
Dugang pa sini nga sa karun lunsay pahanumdom lamang ang ila mahimo bangud wala pa sang go signal halin sa nasambit nga mga ahensiya.
Nahibaluan nga madamo sang grupo na sang mga negosyante ang naalarma sa negatibo nga epekto sa ekonomiya nga ginatuga sang pagpanonto sang KAPA nga ginapamunuan sang isa ka nagpakilala nga pastor nga si Joel Apolinario pinaagi sa promisa nga 30% nga patong sa ila mga gin invest nga kwarta kada bulan.
