Ginklaro sang Global Fashion Icon nga si Heart Evangelista nga wala sila sang nangin problema sang aktres nga si Marian Rivera.
Dugang pa sini nga nahidlaw sia sa kapareho niya nga Kapuso star kag iya ginpabutyag nga nanamian ini sa mga kababa-inhan nga “palaban” kag maisog kasubong kay Marian.
Ulhi nga nahatagan sang kahigayunan ang duha nga maka-updanay sang tuig 2011 para sa comedy film nga “Temptation Island” kaupod ang iban pa nga mga aktres nga sanday Rufa Mae Quinto, Lovi Poe, kag Solenn Heussaff.
Matapos sini, wala na nakit-an nga naka-updanay sanday Marian kag Heart rason nga naglapta naman ang mga huring-huring nga mahimo nga indi maayuhay ang duha.
Oktubre sang nagligad nga tuig naman sang ginkalipay sang fans nga makit-an nga naga-follow ang duha sa Instagram sang isa kag isa.
Matandaan nga nahatagaan man sang moment ang duha sang ginhiwat ang GMA Gala sang nagligad nga Hulyo 20.
Sang damlag lang, nag-renew naman sang iya kontrata si Heart sa GMA Network kag nagalaum nga mahatagan sang proyekto kaupod ang all-star casts kalip na si Marian.
