LAMBAYONG, SULTAN KUDARAT– Napungggan sang mga katapo sang 2nd mechanized Infantry Battalion sang militar kag sang Lambayong Municipal Police Station ang hana nga pagpasigabong sa banwa sang Lambayong, Sultan Kudarat.
Sa interbyu sang Bombo Radyo Koronadal kay Police Lieutenant Gino Fegarido, hepe SAng Lambayong PNP, nagapatigayon sang checkpoint ang tropa sang gobyerno malapit sa bahin sang Brgy. Tinumigues sang may nasiplatan sila nga naka motorsiklo sa indi malayo kag sang makit-an nga nagapatigayon sang checkpoint ang mga otoridad, ginhaboy sang mga ini ang dala nga sako kag gilayon nga naghalin padulong sa indi matumod nga direksyon.
Gintilawan pa nga lagson sang mga otoridad ang mga suspek apang naabtan na lamang sang mga ini ang duha ka sako nga ginbilin ka natukiban ang isa ka bala sang 81mm mortar nga aktibo suno pa kag sarang magsigabong anuman nga oras.
Gilayon nga ginkordon ang area kag ginresponderan sang Explosive Ordnance Disposal Team para sa nagakaigo nga disposisyon sang pampasigabong.
Sa karon ginahibalo pa kun ano nga grupo ang yara sa likod sang hana nga pagpasigabong sa nasambit nga banwa.
