KORONADAL CITY- Ginreklamo ang isa ka miyembro sang Barangay Peace Action Team makaligad suno pa ang alegasyon nga pagpangulata sini sa isa ka player sa ginpatigayon nga basketball league sa Brgy. Zone 4 syudad sang Koronadal.
Base sa reklamo nga ginpalab-ot sa Koronadal City PNP, ginkilala ang reklamante kay John Paul Gonzales, 21 anyos nga residente sang Triniville Subdivision, Brgy. Zone 4 Koronadal City samtang ang ginareklamo sini ang ginkilala kay Ogie Cocjin nga isa ka barangay tanod sa nasambit nga barangay bangud suno pa sang pagpangulata sa iya.
Ini bangud nakaangkon suno pa sang rambol ang mga manughampang nga magkasumpong sa liga.
Apang sa interbyu sang Bombo Radyo Koronadal kay Brgy. Kapitan Gener Janapon, wala suno pa ginkulata sang iya brgy. tanod ang reklamante kag sa baylo nagtambag lamang ini bangud sa nagalala nga tensyon.
Dugang pa nga indi suno pa magpapugong si Gonzales rason nga nag usar sang pwersa ang brgy. tanod nga si Cocjin agud mapunggan ang nasambit nga player.
Kaangot sini nakatalana naman nga ipatawag ni Brgy. kapitan Janapon si John Paul Gonzales agud nga mapaathag man sini ang iya nga bahin kag masettle ang nasambit nga problema.
Bukas naman ang waragwagan sang Bombo Radyo Koronadal para kay Gonzales agud nga maplastar man sini ang iya bersyon sa natabo nga rambol sa Brgy. Zone 4, Koronadal City.
