Naglab-ot sa halos 50 ka nagkalain-lain nga mga kagamitan pang-giyera ang boluntaryo nga ginsungka sang mga residente sang Upi sa isa ka turn-over ceremony nga ginpatigayon ini nga Agosto 8, 2025 sa Municipal Hall sang nasambit nga banwa.
Ginpangunahan sang 57th Infantry (Masikap) Battalion sa idalom sang pagpamuno ni Lt. Col. Aeron T. Gumabao, kaupod ang 603rd Infantry (Persuader) Brigade sa pagpamuno ni Brig. Gen. Michael A. Santos PA, ang aktibidad sa pagpakig-angot sa Municipal Task Force – Ending Local Armed Conflict (MTF-ELAC) Upi kag United Nations Development Programme (UNDP) paagi sa ASPIRE Project.
Kalakip sa mga ginsungka nga armas ang cal. .30 Browning Automatic Rifle, 7.62mm rifles, M653 nga may M203 grenade launcher, M14 rifles, Garand rifles, M1 carbines, grenade launchers, pistols, revolvers, kag shotguns.
Ginpresentar ni Lt. Col. Gumabao ang nasambit nga armas kay Brig. Gen. Santos, kaupod sanday Hon. Ramon A. Piang Sr., Member of Parliament, BTA-BARMM; Hon. Ma. Rona Cristina A. Piang-Flores, Mayor sang Upi; kag Mr. Ronnie Arop Jr., Project Manager sang UNDP.
Ang tanan nga armas ang kasamtangan nga ginkustodiya sang 57IB.
Suno naman kay Brig. Gen. Michael A. Santos, Commander, 603rd Infantry Brigade: “Ang madinalag-on nga pagsungka sang mga kagamitan pang-giyera ang maathag nga pamatuod nga mas ginpili sa karon sang aton mga kababayan ang kalinong kun ikumprar sa kalakasan.
Ini ang bunga sang mapag-on nga pagpakig-angot kag pagbinuligay sang komunidad, lokal nga gobyerno kag militar agud nga masiguro ang seguridad kag kaayuhan sang lugar.
Suno naman kay Maj. Gen. Donald M. Gumiran, Commander, 6th Infantry (Kampilan) Division kag Joint Task Force Central nga ang kampanya batuk sa pagpalapta sang loose firearms ang isa sa mga susi kun sa ano mapabilin ang kalinong kag malikawan ang kalakasan tuga sang mga armado nga grupo.
Ang kadalag-an nga ini ang indi lamang kadalag-an sang militar, kundi kadalag-an man sang mga pumuluyo sa Maguindanao del Norte kag sang bug-os nga Central Mindanao.
Padayon man nga ginaawhag sang mga otoridad ang katawhan nga suportahan ang mga inisyatiba nga magadala sa aton pungsod sang mas luwas kag mainuswagon nga buwas damlag.
