KORONADAL CITY – Naglab-ot na sa halos 3000 pamilya gikan sa 9 ka mga barangay sa banwa sang Kalamansig, Sultan Kudarat and ang nagbakwit bangud sa naeksperiensiyahan nga malapnagon nga baha kag landslide.
Ini ang ginkumpirmar ni Municipal Disaster Risk Reduction and Management Officer Ernie Quillo sa intevriew sang Bombo Radyo Koronadal.
Suno kay Quillo, ang mga pamilya nga nagbakwit ang nagikan sa mga barangay Sta. Maria, Sta. Clara, Cadiz, Pag-asa, Bantogon, Nalilidan, Paril, Hinalaan kag Datu Wasay.
Nagapabilin naman ang pila sa mga pamilya sa ginpreparar nga 11 ka mga evacuation centers sang LGU Kalamansig.
Nahibaluan nga may lima ka mga panimalay pa nga gin-anod sang baha samtang yara sa sulod ang mga nagapuyo diri, maayo na lamang nahingagaw kag na-rescue man ang mga ini gamit ang rescue boat.
Sa pagkamatuod may magtatlo ka adlaw na nga na-isolate bangud indi makahalin sa bahin sang Sitio Midsaker, Brgy. Hinalaan tuga sang mabaskog nga pagragasa sang tubig sa suba.
“Nagbuwis buhay” man ang mga rescuers paagi sa mga relief packs sa mga apektado nga pamilya sa isolated nga lugar.
Magluwas sa baha, nakapagkit man sang 20 landslides sa Barangay Hinalaan kag Barangay Sta. Clara kun diiin mabudlay ang alagyan bangud sa landslide.
Amat-amat naman nga nagpatigayon sang clearing operation sa mga dalanon kun diin napagkit ang pagkatiphag sang duta agud nga maagyan para makapanghatag sang ayuda sa mga apektado nga residente.
Sa subong, indi sa gihapon maagyan ang Sebayor Bridge sa Sitio Tambis. Brgy. Sta. Clara, Kalamansig matapos nga mawasak bangud landslide.
Ang tulay nga ini ang kabahin sang Kalamansig-Palimbang National Highway nga amo ang main road pasulod kag paguwa sa banwa sang Kalamansig.
Ginalauman naman nga pagahimuan sang paagi sang DPWH region 12 ang tulay agud nga liwat maagyan sang mga salakyan.
