Ginalauman pa nga madugangan ang mga loose firearms nga isungka sa mga kasuldaduhan makaligad ang pag turn-over sang halos 30 ka mga matag-as nga kalibre sang armas-luthang sa 57th Infantry Battalion sa Barangay Romongaob, South Upi, Maguindanao del Sur.
Ini ang gin kumpirmar ni Lt. Col. Roden Orbon spokesperson sang 6ID PA kag Joint Task Force Central sa interview sang Bombo Radyo Koronadal.
Suno sa opisyal, ginpangunahan ni Lt. Col. Aeron T. Gumabao, pinuno sang 57IB ang mas ginpasangkad nga kampanya batok sa mga loose firearms pinaagi sa Small Arms and Light Weapons (SALW) Management Program.
Ini suno pa ang nagtulod sa mga residente nga boluntaryo nga isungka ang ila nga mga armas nga ginakalakipan sang .56 MM, M203 Grenade Launcher, Caliber 30 Garand Rifle, M1 Carbine, M14 Sniper Rifle, M79 Grenade Launcher, Caliber. .45 Pistol kag madamo nga iban pa.
Ang nasambit nga mga armas ang pormal nga ginpresintar sa mga opisyal lakip na ang chairman sang Municipal Task Force to End Local Armed Conflict (MTF-ELCAC) kag alkalde sang South Upi.
Suno sa opisyal, ang pagsungka sang mga armas ang pamatoud nga nagsaka ang pagsalig sang mga residente sa katawhayan kag kalinong nga ginaduso sang AFP.
Lakip na diri ang padayon nga pagganyat sang mga opisyal sa mga nag hupot sang indi lisensiyado nga armas nga isungka na sa mga otoridad agud malikawan ang pagkadakop kag pagkabilanggo sang mga indibidwal
